Кривична пријава за 11 лица од Велешта поради каменување на автобусот од „Сприја“

Петок, 08 Март 2013 | Прочитано 338 пати.

Поради постоење основи на сомнение за сторено казнено дело „Насилство“, полициската станица од Струга, поднесе кривична пријава против вкупно единаесет лица, сите од струшкото село Велешта.

Кривичната пријава е поднесена против А.Х.(19), Ф.М.(20), Б.Ќ.(20) како и против малолетниците А.Ќ.(17) Ш.С.(18) В.Р.(18) Г.Т.(18) А.К.(18) Г.К.(18) Б.К.(18) и Ш.С.(18), ученици во средно училиште во Струга.

Оваа група, на 4-ти овој месец поттикната од настаните во Скопје, изврши каменување на автобус на компанијата „Сприја“ што сообраќал на релацијата Струга-Вевчани. Притоа, со телесни повреди се здоби една патничка од Вевчани која по извршените лекарски интервенции во болницата „Св.Еразмо“ во Охрид, беше пуштена на домашно лекување.

Мотивирани од насилните случувања, инцидентите и физичките пресметки  во Скопје, единаесетчлената група околу 20 часот се сретнала во центарот на Велешта каде одлучиле да го нападнат и каменуваат автобусот. Потоа се упатиле кон месноста Суво поле во непосредна близина на магистралниот пат Струга-Дебар.

Тука го сочекале автобусот по што започнале да фрлаат со камења, бекатон плочки и со други тврди предмети оштетувајќи ги предните и страничните стакла како и автобуската каросерија. По извршениот напад и каменување, групата се разбегала низ селото, а дел од учесниците продолжиле да се забавуваат во интернет клубовите. 

Како што информираат од СВР, полициските службеници од Струга и Велешта за кратко време ги идентификувале сторителите. Со нив биле извршени разговори во присуство на претставник на центарот за социјални работи и адвокат за малолетници.

[назад]
loading...
Коментари