Четврт-финалиња на суперѕвезди, клупски колеги, кумови…

Петок, 06 Јул 2018 | Прочитано 57 пати.

Според многумина Светското првенство (СП) во фудбал во Русија е едно од најквалитетните и највозбудливите досега, со редица „класици“ на кои имаше многу голови, особено во последни секунди од средбите, продолженија, пенал-завршници, одлуки со помош на „дебитантот“, системот видеопомошник-судија (ВАР) и многу друго. Имајќи го сето тоа предвид, слично нешто може да се очекува и на денешните и на утрешните четвртфинални дуели. Денешната програма од 16 часот треба да ја отворат Уругвај и Франција, а од 20 часот е дуелот на Белгија и Бразил.


УРУГВАЈ – ФРАНЦИЈА: пред сѐ ќе биде интересен дуелот помеѓу клупските колеги од Атлетико Мадрид, напаѓачот, Французинот Антоан Гризман и одбранбените играчи на Уругвај, Диего Годин и Хозе Хименез. Тие се одлични пријатели, а Годин е и кум на ќерката на Гризман. Лани, откако Франција се квалификува за СП, Гризман се сретна со Годин и со Хименез на аеродромот во Мадрид облечен во дрес на Уругвај.
– Дел од мене е Уругваец. Тоа е нација што ја сакам, земја што ја сакам и ова ќе биде многу емотивен меч за мене – изјави Гризман.
Од друга страна, уругвајскиот напаѓач на Барселона, Луис Суарез, не беше во слично сентиментално расположение.


– Тој е Французин и не знае какво е чувството да се биде Уругваец. Тој не знае кои сме и што сѐ треба да направиме за да бидеме успешни во фудбалот. Тој ги сака и ужива во нашите обичаи, го зборуваме истиот јазик, но ние чувствуваме поинаку – вели Суарез.


Настрана од пријателството меѓу играчите на Атлетико Мадрид, се очекува фасцинантна средба. Двете селекции имаат некои од најголемите напаѓачи на светот во моментов, а во минатата осминафинална рунда ги исфрлија репрезентациите во кои се двата најдобри фудбалери на светот, Лионел Меси во Аргентина и Кристијано Роналдо во Португалија.


Франција ги има тројцата од петтемина најскапи фудбалери, откако трансферот на Килијан Мбапе за 180 милиони евра од Монако во ПСЖ ќе се реализира (уште и Дембеле и Погба). Мбапе е првиот тинејџер, по Бразилецот Пеле на СП 1958, што постигнал два гола на меч на СП (против Аргентина, 4-3).


Уругвај, кој ја елиминира Португалија во претходната рунда (2-1), во нападот ги има Суарез и најдобриот стрелец на ПСЖ на сите времиња, Единсон Кавани, чиј настап денеска е под голем знак прашалник поради повредата на мускулот. Двајцата заедно постигнаа 98 гола за Уругвај.


БРАЗИЛ – БЕЛГИЈА: Белгијците, веројатно, жалат што се најдоа во „потешката“ половина од ждрепката на СП, по освојувањето на првата позиција во групата Г. Во понеделникот, во вистински трилер-меч, Белгија ја елиминира Јапонија, надоместувајќи ја негативата од 0-2 и постигнувајќи го победоносниот гол за 3-2 во последниот напад, во 94-та минута, на 15 секунди пред крајот на средбата. Сега ги очекува првиот фаворит за освојување на титулата, петкратниот шампион Бразил.
Белгија не знае за пораз на 23 меча и е една од двете репрезентации (уште и Уругвај) што ги добија сите четири натпревари на ова СП. По неверојатното враќање против Јапонија, расположението во нивниот табор е на највисоко ниво.
– Кога губевме со 0-2 имав некакво чувство „ОК, немаме што повеќе да загубиме“, што на некој начин нѐ ослободи. Така ќе биде и против Бразил, освен што тоа чувство ќе го имаме уште од првата секунда – вели селекторот на Белгија, Роберто Мартинез.


Во двете репрезентации има неколку суперѕвезди што настапуваат во најпознатите европски тимови, Барселона, Челси, Ливерпул, Манчестер сити и ПСЖ. Нејмар е еден од најдобрите играчи на ова СП и е во центарот на вниманието, понекогаш и поради нефудбалски причини. И на овој меч ќе има дуели на колеги, како Габриел Жезус и Де Брујне од Манчестер сити, Вилијан и Азар од Челси, Фермален и Кутињо од Барселона, итн.


Друга важна работа што треба да се запамети, освен разговорите за одличните напаѓачи на Бразил, е тоа дека според квалитетот и одбраната не заостанува многу, што се гледа и од тоа дека прими само еден гол на последните девет натпревари. На СП во Русија на противниците на четирите меча им дозволија да упатат само пет удари кон нивниот гол.

[назад]
loading...
Коментари