„Воините" го забележаа вториот пораз во три меча, утрово Голден Стејт загуби на гостување кај ЛА Клиперс со 121-116.

Шампионот се мачи без Стеф Кари, по поразот дома од Милвоки, Голден Стејт сега загуби и на гостувањето во „Стејплс Центар“.

ЛА Клиперс водеа цел натпревар, на почетокот од последната четвртина дури имаа и +14, а со двоцифрена предност влегоа и во последните шест минути од мечот.

Но тука застанаа, „Воините“ предводени од Томпсон кој постигна осум поени во овој период, од кои две тројки, направија серија од 11-0, изедначија на 106-106 и се изборија за продолженија.

Томпсон и во додатните пет минути беше незапирлив и го одржуваше Голден Стејт во игра, но и тој остана без муниција во последните мигови па ЛА Клиперс триумфираше со 121-116.

Томпсон мечот го заврши со 31 поен, додека пак Кевин Дурант забележа трипл-дабл учинок од 33 поени, 11 скокови и 10 асистенции, но на стартот од продолжението ја заработи личната грешка број 6 и не можеше да помогне кога беше најпотребно.

Во редовите на ЛА Клиперс, резервистот Лу Вилијамс беше прв играч со 25 поени.

НБА резултати:

Вашингтон - Орландо 117:109
Мајами - Филаделфија 114:124
Торонто - Њу Орлеанс 110:126
Чикаго - Далас 98:103
Мемфис - Јута 88:96
Минесота - Бруклин 120:113
Оклахома - Феникс 118:101
Сакраменто - Сан Антонио 104:99
ЛА Клиперс - Голден Стејт 121:116